के तपाईं सेयर लगानीकर्ता हो ? अब एनआईसी एसिया बैंकले ३ दिनमै करोडौँ दिने !

काठमाडौं, साउन १३ — एनआईसी एसिया बैंकले सेयर बजारमा सक्रिय लगानीकर्ताहरूलाई लक्षित गर्दै प्रतिस्पर्धी ब्याजदरमा सेयर धितो कर्जा दिने योजना सार्वजनिक गरेको छ। बैंकले ८.१७ प्रतिशत ब्याजदरमा कर्जा उपलब्ध गराउने व्यवस्था गरेको हो।

बैंकले सोमबार जारी गरेको प्रेस विज्ञप्तिमा सेयर बजारलाई अर्थतन्त्रको एक मुख्य पाटो मान्दै लगानीकर्ताहरूको वित्तीय आवश्यकतामा सहजता ल्याउने उद्देश्यले यो योजना ल्याइएको उल्लेख गरिएको छ।

नयाँ योजनाअन्तर्गत ग्राहकले नेपाल स्टक एक्सचेन्जमा सूचीकृत बैंक तथा वित्तीय संस्था, बीमा कम्पनीलगायतका सेयरहरू बैंकमा धितो राखेर कर्जा लिन सक्नेछन्। कर्जा मूल्य निर्धारणका लागि १८० दिनको औसत बजार मूल्य वा पछिल्लो कारोबार मूल्य (जुन कम हुन्छ) को ७० प्रतिशतसम्म रकम कर्जाका रूपमा लिन सकिनेछ।

बैंकका अनुसार, यस योजनाबाट ग्राहकले न्यूनतम ५० लाखदेखि अधिकतम १५ करोड रुपैयाँसम्म कर्जा प्राप्त गर्न सक्नेछन्। कर्जा लिन इच्छुक व्यक्तिले आवश्यक कागजातहरू बुझाएपछि ३ कार्य दिनभित्र कर्जा उपलब्ध गराउने प्रक्रिया तय गरिएको छ।

ब्याजदर बैंकको औसत आधार दरमा १ प्रतिशत प्रिमियम थपेर निर्धारण गरिएको हो। हालको आधार दर अनुसार ब्याजदर ८.१७ प्रतिशत कायम गरिएको बैंकले जनाएको छ।

एनआईसी एसिया बैंकको यो योजना सेयर बजारका नियमित लगानीकर्ता, संस्थागत ट्रेडर र पोर्टफोलियो विस्तार गर्न चाहनेहरूका लागि उपयोगी हुने विश्वास लिइएको छ।

पछिल्लो समय सेयर बजारमा तरलताको अभाव देखिएको सन्दर्भमा बैंकको यो कदमले बजारमा सकारात्मक प्रभाव पार्ने अपेक्षा गरिएको छ। सस्तो ब्याजदरमा सहज कर्जा उपलब्ध भएसँगै सेयर कारोबारमा सक्रियता बढ्ने विश्वास गरिएको छ।