काठमाडौं,४ साउन । महानगरपालिकाले कक्षा ११ र १२ का लागि लिएको छात्रवृत्ति परीक्षाको नतिजा सार्वजनिक गरेको छ। शनिबार सम्पन्न परीक्षामा १४,१७३ विद्यार्थी सहभागी भएका थिए, जसमध्ये १०,८६७ जना उत्तीर्ण भएका छन्।

महानगरका अनुसार करिब ४,४९९ जना विद्यार्थीले छात्रवृत्तिको अवसर प्राप्त गर्ने अनुमान गरिएको छ। सफल विद्यार्थीहरूले काठमाडौं महानगरभित्रका १६१ वटा निजी विद्यालयमा पूर्ण छात्रवृत्तिमा अध्ययन गर्न पाउनेछन्।

संकायअनुसार उत्तीर्ण संख्या फरक रहेको छ। विज्ञान संकायमा ८,७५० जना, व्यवस्थापनमा १,९५७, कानुनमा १३५, शिक्षा संकायमा १९ र मानविकीमा ६ जना उत्तीर्ण भएका छन्।

छात्रवृत्तिका लागि आवेदन दिँदा छनोट गरिएको विद्यालय र विषयका आधारमा नामांकन हुनेछ। नतिजामा चित्त नबुझेमा विद्यार्थीले साउन ५ गतेसम्म पुनर्योग गर्न सक्नेछन्। पुनर्योगपछि मात्र अन्तिम नामांकन सूची प्रकाशन हुनेछ।