काठमाडौँ,३१ भदौ। भदौ २४ गतेको घटनापछि मुलुकका शीर्ष नेताहरू सेनाको ब्यारेकमै रात बिताउन बाध्य भए। पूर्वप्रधानमन्त्रीसहित झण्डै सय जना नेता मन्त्री र कर्मचारीहरूलाई सुरक्षाका कारण विभिन्न ब्यारेकमा सारिएको थियो। अधिकांश नेता केही दिनमै डेरा फर्किए पनि निवर्तमान प्रधानमन्त्री केपी शर्मा ओलीसहित करिब एक दर्जन नेता अझै पनि सेनाकै निगरानीमा बसिरहेका छन्।
सेनाले धेरैलाई शिवपुरीस्थित ब्यारेकमा राखेको भए पनि ओलीको टोली भने ललितपुरको एउटा ब्यारेकमै छ। ओलीले राजीनामा दिएलगत्तै बालुवाटारस्थित सरकारी निवासबाट सेनाको हेलिकोप्टरमार्फत उद्धार गरिएको थियो। पूर्वप्रधानमन्त्री पुष्पकमल दाहाल, माधवकुमार नेपाल, झलनाथ खनाल र बाबुराम भट्टराईलाई पनि त्यतिबेला ब्यारेकमै राखिएको थियो। तर तीमध्ये सबै फर्किएर अब सामान्य जीवन खोजिरहेका छन्।
तर ओली र केही मन्त्री अझै पनि ब्यारेक छाड्न सकेका छैनन्। कारण उनीहरूको निवास जलेर नष्ट भएको मात्र होइन आन्दोलनकारीहरूको आक्रोश अझै पूर्ण रूपमा थामिएको छैन। सेनाले पनि सुरक्षा चुनौती अझै कायमै रहेको भन्दै उनीहरूलाई सुरक्षित राखिरहेको छ।
२४ गते रातिदेखि कर्फ्यु जारी गरिएको थियो। त्यसबेला सडकमा देखिएका सैनिकहरू अहिले ब्यारेक फर्किए पनि आकस्मिक अवस्था आउन सक्ने भन्दै उच्च सतर्कतामा छन्। काठमाडौँ उपत्यकाबाहिरबाट ल्याइएका थप सैनिक पनि फिर्ता गरिएका छैनन्।
सैनिक स्रोतका अनुसार, “जटिल अवस्थामा सुरक्षा दिनु हाम्रो कर्तव्य हो। धेरै नेताहरू डेरा खोजिरहेका छन्, केही आफन्तकहाँ बसिरहेका छन्। हिजोसम्म १५–२० जना ब्यारेकमै हुनुहुन्थ्यो। अहिले धेरै फर्कनुभयो। तर को-को कहाँ हुनुहुन्छ भन्ने खुलाउन मिल्दैन।”
ब्यारेकमा रहेका नेताहरूलाई सुरुमा मोबाइल प्रयोग गर्न दिइएको थिएन। तर अन्तरिम प्रधानमन्त्री बनेकी सुशीला कार्की नियुक्त भएपछि यो प्रतिबन्ध हटाइएको थियो।
अधिकांश पूर्वप्रधानमन्त्री आफ्ना आफन्त वा नजिकै डेरा खोजेर बसेका छन्। बाबुराम भट्टराई आफन्तकहाँ छन् भने झलनाथ खनाल जलेको घरनजिकै डेरामा बसिरहेका छन्। माधव नेपाल र प्रचण्ड पनि आफ्ना पुराना निवास छाडेर अन्यत्रै पुगेका छन्। तर ओली भने अझै सेनाको निगरानीमै छन्।
ओलीका आफन्त भन्छन्, “सरकारले सुरक्षाबारे निर्णय गरेपछि मात्र हामी कहाँ बस्ने भन्ने टुंगो लाग्छ। निर्णय भएन भने पनि त्यसअनुसार व्यवस्था मिलाउनुपर्ने हुन्छ।”
भदौ २३ गते १९ जना प्रदर्शनकारी प्रहरीको गोलीबाट मारिएपछि आन्दोलन झन् आक्रामक बनेको थियो। संसद भवनमा तोडफोडसँगै सुरु भएको हिंसाले राजधानीभर तनाव फैलाएको थियो। त्यसैका बीचमा नेताहरूको घर, कार्यालय जलेपछि भागाभाग मच्चिएको थियो।
नेताहरू अहिले अस्पताल, आफन्तको घर वा नयाँ डेरामा बसिरहेका छन्। तर निवर्तमान प्रधानमन्त्री ओलीसहितका केही नेता अझै पनि सेनाकै घेराभित्र दिन बिताइरहेका छन्। परिस्थिति सामान्य नहुँदासम्म उनीहरू खुला वातावरणमा फर्कन सक्ने अवस्था छैन।
सैनिक स्रोतका शब्दमा, “अझै केही दिन उच्च सतर्कताकै वातावरण रहनेछ। नेताहरू सुरक्षित नहुन्जेल हामी ग्यारेन्टी दिन सक्दैनौँ।”
यसरी आन्दोलनले मुलुकको शीर्ष नेतृत्वलाई पनि सामान्य नागरिकझैँ असुरक्षित बनाइदिएको छ। अहिलेको प्रश्न भने यही हो ओली र अन्य नेताहरू कहिले ब्यारेक छाडेर सामान्य जीवनमा फर्किन्छन् ?