हेटौँडा, साउन २३ — बागमती प्रदेशका मुख्यमन्त्री इन्द्रबहादुर बानियाँले साउन २७ गते प्रदेशसभाबाट विश्वासको मत लिने भएका छन्। एमाले–काँग्रेस गठबन्धनबाट साउन २० गते मुख्यमन्त्री नियुक्त भएका बानियाँले नेपालको संविधानअनुसार ३० दिनभित्र संसद्बाट विश्वासको मत लिनुपर्ने संवैधानिक व्यवस्था छ।
संविधानको धारा १६८ को उपधारा (४) तथा प्रदेशसभा नियमावली २०७४ को नियम १४३ को उपनियम (१) अनुसार बानियाँले विश्वासको मत लिन लागेका हुन्। मुख्यमन्त्री नियुक्त भए लगत्तै उनले संसद्बाट विश्वासको मत लिन आवश्यक तयारी थालेका थिए।
विश्वासको मत लिनका लागि साउन २७ गते प्रदेशसभा बैठक बस्नेछ। बानियाँले त्यस दिनको बैठक आह्वान गर्न सभामुख भुवनकुमार पाठकलाई अनुरोध गरेका छन्। सभामुख पाठकले आवश्यक परामर्श गरी मिति टुङ्गो लागे पनि औपचारिक पत्र प्राप्त भएपछि मात्रै बैठकको समय निर्धारण गरिने बताएका छन्।
इन्द्रबहादुर बानियाँ नेपाली काँग्रेसका बागमती प्रदेश सभापति समेत हुन्। उनी ३७ जना काँग्रेस र २७ जना एमाले सांसदको समर्थनमा बहुमतसहित मुख्यमन्त्री बनेका हुन्। हाल बागमती प्रदेशसभामा कुल ११० जना सांसद रहेका छन्। बहुमतका लागि ५६ मत आवश्यक पर्छ।
बानियाँले आफ्नै दलका नेता एवं तत्कालीन मुख्यमन्त्री बहादुर सिंह लामाविरुद्ध अविश्वास प्रस्ताव दर्ता गराएका थिए। काँग्रेसको प्रदेश संसदीय दलको नेताका लागि भएको चुनावमा बानियाँ विजयी भएपछि लामा पदमुक्त भएका थिए। त्यसपछि बानियाँलाई गठबन्धनको सहमतिमा प्रदेश प्रमुख युवराज खतिवडाले मुख्यमन्त्री नियुक्त गरेका थिए।
मुख्यमन्त्रीको रूपमा बानियाँले प्रदेश सरकारमा नवीन दृष्टिकोणका साथ कार्य गर्ने सङ्केत दिएका छन्। विश्वासको मत प्राप्त गरेसँगै उनले मन्त्रिपरिषद् विस्तार गर्ने तयारीसमेत अघि बढाउने जनाइएको छ।