काठमाडौँ, ९ साउन । भिजिट भिसामा खाडी मुलुक कुवेत जाँदै गरेकी ४७ जना नेपाली महिला भारतको नयाँदिल्ली विमानस्थलबाट पक्राउ परेका छन्।
उनीहरूलाई नो अब्जेक्सन सर्टिफिकेट (एनओसी) नलिई गैरकानुनी रूपमा विदेश जान खोजेको पाइएपछि दिल्लीस्थित इन्दिरा गान्धी अन्तर्राष्ट्रिय विमानस्थलमा नियन्त्रणमा लिइएको हो। नेपाली महिलाहरू दलालमार्फत कुवेत जान लागेको भन्ने गोप्य सूचनाका आधारमा प्रहरीले अनुसन्धान थालेको थियो।
रुपन्देहीका प्रमुख जिल्ला अधिकारी वासुदेव घिमिरेका अनुसार दिल्लीस्थित नेपाली दूतावाससँगको समन्वयमा ती महिलालाई नियन्त्रणमा लिइएको हो। ‘उनीहरूलाई स्थलमार्ग हुँदै बिहीबार राति रुपन्देही ल्याइएको थियो,’ प्रजिअ घिमिरेले जानकारी दिए, ‘गएराति १ बजे गाडीमार्फत काठमाडौँ पठाइएको छ।’
नेपाल फर्काइएकी ती महिलाहरूबाट प्रारम्भिक बयान लिइएको र उनीहरूलाई ललाइफकाइ गरी मानव तस्करले भिजिट भिसामा कुवेत पुर्याउने योजनामा रहेको खुल्न थालेको छ।
दिल्लीस्थित नेपाली दूतावासमा कार्यरत प्रहरी वरिष्ठ उपरीक्षक (एसएसपी) प्रकाश मल्लसहितको टोलीले ती महिलालाई सुनौली नाका हुँदै नेपाल ल्याएको हो। नेपाली दूतावास र भारतीय सुरक्षाकर्मीबीच समन्वय गरी यो कार्य सम्पन्न गरिएको हो।
गृहमन्त्री रमेश लेखकले यस घटनालाई गम्भीर रूपमा लिँदै मानव बेचबिखन अनुसन्धान ब्युरोलाई छानबिन गर्न निर्देशन दिएका छन्। गृहमन्त्रालय स्रोतका अनुसार, ‘गृहमन्त्रीले दोषी दलाल पहिचान गरी कानुनी दायरामा ल्याउन कडा निर्देशन दिएका छन्।’
नेपालमा एनओसीबिना खाडी मुलुक जान रोक लगाइएको छ। यस्ता घटना दोहोरिइरहनु मानव तस्करीको नयाँ तरिका र समुहगत गिरोहको संकेत मानिएको छ।
यस घटनाले श्रम मन्त्रालय र प्रवासी श्रमिकका सुरक्षा मापदण्डमाथि प्रश्न उठाएको छ। सरकार अब यो घटनालाई उदाहरणीय कारबाहीका रूपमा लिएर दलाल सञ्जालमाथि कडा प्रहार गर्ने तयारीमा देखिन्छ।