म्याग्दी, १९ चैत । अन्नपूर्ण हिमाल आरोहणका लागि वसन्तयाममा आउने आरोहीहरू आधार शिविरमा पुग्न थालेका छन्। म्याग्दीको अन्नपूर्ण गाउँपालिका–४ नारच्याङस्थित ४,१०० मिटर उचाइमा रहेको आधार शिविरमा अहिले आरोही, शेर्पा, पथप्रदर्शक, मजदुर तथा पर्यटकको चहलपहल बढेको छ।
अन्नपूर्ण आधार शिविरलाई आरोहीहरूले टेन्ट टाँगेर अस्थायी बस्तीझैं बनाएका छन्। वडासदस्य श्याम पुर्जाका अनुसार आरोहीहरूसँगै आन्तरिक तथा विदेशी पर्यटकको पनि आगमन सुरु भएको छ।
आरोहण अनुमति र तयारी
पर्यटन विभागका अनुसार यस वसन्तयाममा अन्नपूर्ण हिमाल आरोहणका लागि पाँच समूहका ३० पुरुष र १२ महिलाले अनुमति लिएका छन्। अहिलेसम्म पाँच हिमाल आरोहण गर्न ५८ जनाले अनुमति लिएकोमा सबैभन्दा बढी अन्नपूर्ण हिमाल चढ्न चाहने छन्।
अहिले विश्वभरका आरोहीहरू पायनियर एडभेन्चर, आठ के एक्सपिडेसन, इमेल नेपाल, सेभेन समिट, १४ पिक्स एक्सपिडेसन, मकालु एडभेन्चर, बोचीबोची पिक्समार्फत अन्नपूर्ण आधार शिविरमा पुगेका छन्। सेभेन समिटका पेम्बा शेर्पाका अनुसार भारतीय आरोहीहरूको एउटा टोलीले अन्नपूर्ण चढेपछि सगरमाथा जाने योजना बनाएको छ।
अन्नपूर्ण आरोहणको इतिहास
विश्वको दशौं अग्लो अन्नपूर्ण हिमाल (८,०९१ मिटर) १९५० मा पहिलोपटक फ्रान्सका मौरिस हर्जोगले आरोहण गरेका थिए। अन्नपूर्ण मानव पाइला टेकिने पहिलो ८,००० मिटर अग्लो हिमाल भएको कारण ‘जेठो हिमाल’ भनेर चिनिन्छ।
पदमार्गको विकास र प्रभाव
मौरिस हर्जोगले प्रयोग गरेको बाटोलाई पहिचान गर्दै नारच्याङ–आधार शिविर जोड्ने पदमार्ग २०६७ सालमा तेज गुरुङको अगुवाइमा विकास गरिएको थियो। यसपटक पदमार्ग प्रयोग गरी मजदुरहरूले सामान बोकेर आधार शिविर पुर्याएका छन्, जसले भरियाहरूलाई रोजगारी सिर्जना गरेको छ।
पर्यटक सुविधामा सुधार
नारच्याङ–आधार शिविर पदमार्गमा चिया पसल, अस्थायी शिविर तथा भोजनालय सञ्चालनमा आएका छन्। यसले पर्यटकलाई खान, बस्न सहज भएको छ।
अन्नपूर्ण आधार शिविरका आकर्षण
शान्त वातावरण, दुर्लभ वनस्पति, वन्यजन्तु, अग्ला झरना, मनमोहक हिमशृङ्खला, र निलो पञ्चकुण्डताल यहाँका प्रमुख आकर्षण हुन्। नारच्याङबाट दुई घण्टा सवारीयात्रा गरी हुमखोलामा पुगेर दुई दिनको पैदलयात्रापछि आधार शिविर पुग्न सकिन्छ। छोटो र रोमाञ्चक यात्रा भएकाले पर्यटकको चाप बढ्दै गएको छ।


