वार्ताद्वारा समस्या समाधान भयो इन्द्रचोकमा ट्याक्सी व्यवसायी र महानगर प्रहरीबीचको झडप

Categories:

-

काठमाडौँ, २१ पुस । इन्द्रचोकमा अनधिकृत पार्किङ हटाउने क्रममा महानगर प्रहरी र ट्याक्सी व्यवसायीबीच झडप भएको छ। सडकमा १२–१५ वटा ट्याक्सी जथाभावी पार्किङ गरेको भन्दै महानगर प्रहरी टोलीले कारबाही प्रक्रिया सुरु गर्दा झडपको स्थिति सिर्जना भएको हो।

महानगर प्रहरी प्रमुख राजुनाथ पाण्डेका अनुसार ट्याक्सी व्यवसायीहरूले सडक लेन अनुशासन उल्लङ्घन गर्दै पार्किङ गरेका थिए। “हामीले हटाउन अनुरोध गर्दा व्यवसायीहरू प्रतिरोधमा उत्रिए, जसका कारण तनाव उत्पन्न भयो,” उनले भने।

झडपमा महानगर प्रहरी र अखिल नेपाल ट्याक्सी व्यवसाय संघका केही मजदुरहरू घाइते भएको बताइएको छ। प्रहरी टोलीले अनधिकृत पार्किङ हटाउन खोज्दा व्यवसायीहरूले विरोध गरेपछि स्थिति नियन्त्रणबाहिर गएको थियो।

झडपका कारण केही समय इन्द्रचोक क्षेत्रको जनजीवन प्रभावित भयो। महानगर प्रहरीका अनुसार अनधिकृत पार्किङको कारणले क्षेत्रको ट्राफिक व्यवस्थापनमा समस्या भइरहेकाले कारबाही गर्नु अपरिहार्य थियो।

यद्यपि, दिउँसो महानगर प्रहरी बल कार्यालयमा दुवै पक्षबीच छलफलपछि समस्या समाधान भएको छ। छलफलमा दुवै पक्षले आआफ्ना क्षतिपूर्ति व्यहोर्ने सहमति गरेका छन्। व्यवसायीहरूले आगामी दिनमा सडक लेन अनुशासन पालना गर्ने र महानगरले पार्किङ व्यवस्थापनमा सहजीकरण गर्ने सहमति भएको छ।

महानगर प्रहरी प्रमुख पाण्डेले भने, “वार्तामा समस्या समाधान भएको छ। व्यवसायीहरूले अनुशासन पालना गर्ने प्रतिबद्धता जनाएका छन्। महानगरले पनि पार्किङ व्यवस्थापन सहज बनाउन सहयोग गर्नेछ।”

ट्याक्सी व्यवसायीहरूले भने उपयुक्त पार्किङ व्यवस्था नभएको कारणले सडकमै पार्किङ गर्नुपरेको गुनासो गरेका छन्। “महानगरले पार्किङ स्थलको व्यवस्था नगर्दासम्म समस्या रहिरहनेछ,” एक व्यवसायीले बताए।

यस सहमतिले इन्द्रचोक क्षेत्रको ट्राफिक व्यवस्थापन सुधार गर्ने र व्यवसायी र महानगरबीचको सम्बन्धमा सुधार ल्याउने अपेक्षा गरिएको छ।

प्रतिक्रिया दिनुहोस्
spot_img

भर्खरै

साहित्य