काठमाडौं, मंसिर १५– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले नेपाली कांग्रेसका महामन्त्री गगन थापाले आफूविरुद्ध झुट बोलेको आरोप लगाएका छन्।
खुमलटारमा शनिबार आयोजित कार्यक्रममा बोल्दै प्रचण्डले गगन थापाले आफ्नो सभापति शेरबहादुर देउवालाई प्रधानमन्त्री बन्न प्रस्ताव गरेको भनी दिएको अभिव्यक्तिलाई पूर्णतया झुटो दाबी गरेका हुन्। उनले सत्ता परिवर्तनको कुनै पनि प्रयास आफूबाट नभएको स्पष्ट पार्दै थापाको आरोपलाई “सफेद झुट” भने।
गगनप्रति गम्भीर टिप्पणी
पूर्वप्रधानमन्त्री प्रचण्डले कांग्रेस महामन्त्री गगन थापालाई सम्भावना बोकेको युवा नेता भन्दै आफ्नो अपेक्षा विपरीत तल्लो स्तरमा झरेर झुट बोलेको आरोप लगाए।
“गगनजीप्रति मलाई साँच्चै दया लागेको छ। कति छिटो र कति तल झर्न सकेका रहेछन्,” प्रचण्डले भने। उनले गगन थापासँग विगतमा संवाद र सहकार्य हुँदै आएको स्मरण गर्दै अहिले छोटो समयमा आएको परिवर्तनप्रति आश्चर्य प्रकट गरे।
सरकारमा नरहँदा सहज भएको भनाइ
अध्यक्ष प्रचण्डले आफूले सरकारमा नबस्न रोजेको र यसले आफ्नो पार्टीलाई जनतासँग जोडिन सहज बनाएको उल्लेख गरे।
“मैले सरकारलाई ०८४ सम्म चलाउन सुझाव दिएको छु। शेरबहादुर देउवासँग प्रत्यक्ष या परोक्ष रूपमा यो विषयमा कुनै पनि छलफल भएको छैन,” उनले भने।
राजनीतिक विवादमा नयाँ मोड
गगन थापाले दिएको अभिव्यक्ति र प्रचण्डको प्रतिवादले नेपाली राजनीतिक वृतमा नयाँ बहसको विषय बनाएको छ। यसले कांग्रेस र माओवादी केन्द्रबीचको सम्बन्धमा असर पर्न सक्ने सम्भावना पनि देखिएको छ।
युवा नेताको रूपमा स्थापित थापा र अनुभवी नेताका रूपमा रहेका प्रचण्डबीचको यो सार्वजनिक विवादले दुवै दलका कार्यकर्ताहरूमा मिश्रित प्रतिक्रिया उत्पन्न गरेको छ।


