काठमाडौँ,३ मङ्सिर ।राष्ट्रिय स्वतन्त्र पार्टी (रास्वपा)ले आगामी उपनिर्वाचनका लागि ४२ स्थानमध्ये २६ स्थानमा मात्र उम्मेदवारी दर्ता गरेको छ। पार्टीले पहिल्यै कुनै पनि गठबन्धन नगर्ने र सबै क्षेत्रमा स्वतन्त्र प्रतिस्पर्धा गर्ने बताएको भए पनि, संघीय राजधानी काठमाडौंको कीर्तिपुर नगरपालिकासहित १६ स्थानमा उम्मेदवार नउठाउने निर्णय गरेको छ।
रास्वपाले ओखलढुंगा र कैलालीको जिल्ला समन्वय समिति (जिसस) प्रमुख, कीर्तिपुर नगरपालिकाको मेयर, बाजुराको स्वामीकार्तिक खापर गाउँपालिकाको उपाध्यक्ष, र रुकुम पूर्वको पुथा उत्तरगया गाउँपालिकाको उपाध्यक्ष पदका लागि उम्मेदवारी दर्ता गरेन।
यसका साथै, झापाको कन्काई नगरपालिका-६, कीर्तिपुरको वडा नम्बर १ र ४, सप्तरीको डाक्नेश्वरी नगरपालिका-१, ४, रौतहटको इशनाथ नगरपालिका-७, राजपुर-६, र गढीमाई-८ मा पनि उम्मेदवार नउठाएको छ। डोल्पाको त्रिपुरासुन्दरी नगरपालिका-५, रुकुम-पश्चिमको सानीभेरी नगरपालिका-५, बझाङ्गको सुर्मा गाउँपालिका-४, र दार्चुलाको दुहु गाउँपालिका-५ मा पनि रास्वपाले प्रतिस्पर्धा नगर्ने निर्णय गरेको छ।
