उपत्यका अपराध अनुसन्धान कार्यालयका दुई प्रहरी नै लुटपाटमा संलग्न

Categories:

-

काठमाडौँ,२३ कार्तिक । काठमाडौं उपत्यकामा गम्भीर अपराध अनुसन्धानमा खटिएका दुई प्रहरी स्वयं लुटपाट घटनामा संलग्न रहेको पाइएको छ। उपत्यका अपराध अनुसन्धान कार्यालयमा कार्यरत प्रहरी सहायक निरीक्षक अनबहादुर पुन र प्रहरी जवान धीर बुढा कलंकीस्थित एक रेस्टुरेन्टमा भएको लुटपाट घटनामा मुछिएका छन्। महाशाखाको टोलीले उनीहरूलाई पक्राउ गरेर थप अनुसन्धानका लागि बुधबार जिल्ला प्रहरी परिसर काठमाडौंमा बुझाएको छ।

घटना अनुसार, अनबहादुर पुन र धीर बुढा कीर्तिपुर प्रहरी वृत्तमा कार्यरत थिए। प्रहरी स्रोतका अनुसार, उनीहरूले बिचौलियासँग मिलेर पुरानो लेदरको पैसा लुटपाटको योजना बनाएका थिए। घटनाको समयमा पुन र बुढा रेस्टुरेन्टबाहिर बसेका थिए भने बिचौलियाले रेस्टुरेन्टमा पुरानो लेदरको पैसा लिएर आएका युवकलाई हत्कडी लगाएर नियन्त्रणमा लिएको थियो।

प्रहरीको आन्तरिक अनुसन्धानले उनीहरूकै संलग्नतामा बिचौलियालाई हत्कडीसमेत उपलब्ध गराइएको र यो प्रक्रिया अपराधका लागि प्रयोग गरिएको पुष्टि गरेको छ। घटनाले प्रहरी संगठनप्रतिको जनविश्वासमा गम्भीर प्रश्न खडा गरेको छ, किनकि गम्भीर अपराध नियन्त्रण गर्ने जिम्मेवार अधिकारीहरू नै लुटपाटमा संलग्न पाइएका हुन्।

प्रहरीले उनीहरूमाथि थप अनुसन्धान सुरु गरिसकेको छ। स्रोतका अनुसार, पक्राउ परेका दुवै प्रहरीमाथि कानून बमोजिमको कारबाही प्रक्रिया अघि बढाइनेछ। यस घटनाले प्रहरी संगठनभित्र सुधार र अनुशासनको आवश्यकता भएको स्पष्ट पारेको छ। राजधानीको सुरक्षा जिम्मा लिएका निकायका कर्मचारीहरू अपराधमा संलग्न हुँदा यसले कानूनको प्रभावकारिता र प्रहरी संगठनको छविमा गम्भीर असर पार्न सक्ने विज्ञहरूले बताएका छन्।

प्रतिक्रिया दिनुहोस्
spot_img

भर्खरै

साहित्य