काठमाडौं, असोज ४ – भैँसेपाटी प्रहरी प्रभागकी तत्कालीन प्रमुख विनुकुमारी शाही मुछिएको हनी ट्रयाप प्रकरणमा संगठित अपराधअन्तर्गत पनि अनुसन्धान हुने भएको छ। ललितपुर प्रहरीले अदालतबाट संगठित अपराधमा म्याद थप्दै अनुसन्धानलाई अगाडि बढाएको हो, जसले अब पक्राउ परेकाहरूलाई ६० दिनसम्म हिरासतमा राखेर अनुसन्धान गर्न सकिनेछ।
ललितपुर प्रहरी प्रमुख शेखर खनालले घटनामा संगठित अपराधको आधारमा अनुसन्धान भइरहेको बताए। यस प्रकरणमा हालसम्म चार जनालाई पक्राउ गरिएको छ भने इन्सपेक्टर शाही फरार रहेकी छिन्। आरोप छ कि गिरोहले बलात्कारमा फसाउने धम्की दिँदै पीडितसँग ३० लाख रुपैयाँ असुलेको थियो। शाहीले आफन्तको नाममा पैसा जम्मा गर्न लगाएको दाबी गरिएको छ।
शाहीविरुद्ध फौजदारी मुद्दा दर्ता गर्न अदालतबाट अनुमति प्राप्त भएपछि उनलाई पक्राउ गर्न प्रहरी प्रयासरत छ।
प्रतिक्रिया दिनुहोस्


