उच्च अदालत बार, पाटनको निर्वाचन: विदुरप्रसाद ढुङ्गानाको टीम विजयी

Categories:

-

काठमाडौं, २ भदौ: उच्च अदालत बार, पाटनको निर्वाचनमा विदुरप्रसाद ढुङ्गानाको नेतृत्वमा रहेको टीमले सफलता प्राप्त गरेको छ। शनिबार सम्पन्न भएको निर्वाचनमा ढुङ्गाना अध्यक्षमा निर्वाचित भएका छन्। यससहित उपाध्यक्षमा विष्णु ऋषि कोइराला, सचिवमा प्रवल शर्मा, कोषाध्यक्षमा भुपाल बस्नेत, र सहसचिवमा शुसिला चौधरी निर्वाचित भएका छन्।

महिला सदस्यतर्फ विमला कुमारी शर्मा, जितिन्द्रा विष्ट, र अधिवक्ता पुष्पा भुसालले जित हासिल गरेका छन्। सदस्यमा चित्र बहादुर कुताल विष्ट, रामानन्द चौधरी थारु, तिलक बहादुर पाण्डे, भानु निरौला, छन्दप्रसाद आचार्य, भिष्मप्रसाद पौड्याल, सुशिला श्रेष्ठ, कृष्ण सिंह महरा, रेशम कंडेल, निकेश कुमार लम्साल, र केशव खतिवडा निर्वाचित भएका छन्।

निर्वाचनमा प्रमुख राजनीतिक दलहरु एमाले, माओवादी केन्द्र, नेपाली कांग्रेस, र एकीकृत समाजवादी निकट कानुन व्यवसायीहरुको पेशागत संगठनले गठबन्धन गरेका थिए। गठबन्धनका तर्फबाट एमाले–माओवादी निकट कानुन व्यवसायीहरुको टीमले पुरै प्यानल जितेको हो।

निर्वाचनमा उच्च अदालत बार पाटनका २,६३१ सदस्यले सहभागिता जनाएका थिए। बारको निर्वाचन पाटनमा कानुन व्यवसायीहरुको लागि महत्वपूर्ण घटनाको रुपमा हेरिएको थियो।

विदुरप्रसाद ढुङ्गानाको नेतृत्वमा निर्वाचित टीमले कानुन व्यवसायीहरुको हकहितका लागि क्रियाशील रहने प्रतिवद्धता व्यक्त गरेको छ। यस जीतले उच्च अदालतमा कानुनी पेशामा राजनीतिक प्रभावलाई पुनः एकपटक पुष्टि गरेको छ। ढुङ्गानाले सबै सदस्यहरुलाई धन्यवाद दिँदै आगामी कार्यकालमा कानुनी पेशाको प्रतिष्ठा र न्यायालयको गरिमालाई उच्च राख्ने प्रतिवद्धता व्यक्त गरेका छन्।

निर्वाचित टीमको यो सफलता आगामी दिनमा उच्च अदालत बार क्षेत्रका कानुन व्यवसायीहरुको पेशागत, सामाजिक, र आर्थिक हितका लागि महत्वपूर्ण हुने विश्वास गरिएको छ।

प्रतिक्रिया दिनुहोस्
spot_img

भर्खरै

साहित्य