भक्तपुर, ३२ साउन । गठ्ठाघरमा बिहीबार भएको स्कुटर दुर्घटनामा ज्यान गुमाउने व्यक्तिलाई आफ्नो बहिनी भन्दै झुटो दाबी गर्ने युवकलाई भक्तपुर प्रहरीले पक्राउ गरेको छ। पक्राउ परेका व्यक्ति दोलखाको मेलुङ गाउँपालिका-४ का ३० वर्षीय शम्भु नेपाली हुन्।
घटनास्थलमा पुगेका शम्भुले मृतक महिला आफ्नी बहिनी भएको दाबी गरेपछि प्रहरीले सुरुमा मृतकको पहिचान गलत गर्यो। पछि अनुसन्धानको क्रममा मृतक महिला नभएर ६५ वर्षीय पुरुष उत्तम कोइराला भएको पुष्टि भयो। मृतकसँगै फेला परेको सवारी लाइसेन्समा “उत्तम कोइराला, ओखलढुंगा रातमाटे-५” लेखिएको थियो, जसका आधारमा पछि उनका आफन्तहरूले शवको पहिचान गरे।
शम्भु नेपालीले यसअघि पनि पटक-पटक आफ्नी बहिनीको मृत्यु भएको भन्दै झुटो हल्ला फैलाउने गरेको पाइएको छ। यस घटनापछि, प्रहरीले उनलाई ठिमी प्रहरीको नियन्त्रणमा राखेको छ र उनीविरुद्ध मुद्दा चलाउने तयारी गरिरहेको छ।
घटना बिहीबार दिउँसो भएको थियो, जहाँ ना ६ ख २१७३ नम्बरको ट्रकले बा ३९ प ८९४४ नम्बरको स्कुटरलाई ठक्कर दिँदा घटनास्थलमै कोइरालाको मृत्यु भएको थियो। प्रारम्भिक रूपमा महिलाको मृत्यु भएको भनेर प्रहरीद्वारा सार्वजनिक विवरण पछि गलत साबित भएको थियो।
शम्भु नेपालीले किन र कसरी मृतकलाई आफ्नो बहिनी भन्दै झुटो दाबी गरे भन्ने अझै स्पष्ट भएको छैन। प्रहरीले यस विषयमा थप अनुसन्धान गरिरहेको छ।


