काठडमाडौँ– विद्यार्थीले शिक्षक कुटेको विरोध स्वरुप रत्नराज्यलक्ष्मी क्याम्पसका शिक्षकहरुले पठनपाठन बन्द गर्ने निर्णय गरेका छन् ।
मंगलबार रत्नराज्यलक्ष्मी क्याम्पस प्राध्यापक संघ, प्रजातन्त्रवादी प्राध्यापक संघ र नेपाल प्रगतिशील प्राध्यापक संगठनले संयुक्त विज्ञप्ति जारी गर्दै पठनपाठन बन्द भएको जानकारी दिएका हुन् ।
शैक्षिक संस्था जस्तो उच्च नैतिकता प्रर्दशन गर्नुपर्ने स्थलमा गुन्डागर्दी भएको भन्दै प्रध्यापक संघले शिक्षकमाथि कुटपिट गर्ने विद्यार्थीप्रति खेद प्रकट गरेको छ ।
शैक्षिक संस्थामा प्राध्यापकहरु नै असुरक्षित हुने अवस्था रहेसम्म र आक्रमणकारी विद्यार्थीलाई कारबाही नभएसम्म अध्यापन नगर्ने जारी विज्ञप्तिमा उल्लेख गरिएको छ ।
क्याम्पसको आन्तरिक परीक्षामा चिट चोर्ने नदिएको भन्दै विद्यार्थी कुवेर जेठाराले एक शिक्षकलाई कुटपिट गरेका थिए ।
कुटपिटबाट घाइते शिक्षकको काठमाडौँ मोडल अस्पतालमा उपचार भइरहेको क्याम्पस प्रशासनले जनाएको छ ।
