काठमाडौं,१५ भदौ । संयुक्त अरब इमिरेट्सकी १५ वर्षीया रुडा अलसरकालले गल्फ क्षेत्रमा पहिलोपटक महिला ग्र्यान्डमास्टर (Woman Grandmaster) को उपाधि हात पारेकी छन्। उनले यो ऐतिहासिक उपलब्धि गत नोभेम्बरमा आयोजित अरब महिला चेस च्याम्पियनसिपको आठौं चरणमा जित हासिल गर्दै प्राप्त गरेकी हुन्।
अबुधाबीमा हुर्केकी अलसरकालले सो खेल जितेपछि पर्याप्त अंक बटुलेर ग्र्यान्डमास्टर उपाधि प्राप्त गरिन्। उनले यो उपलब्धिसँगै न केवल आफ्नै देश, बरु सम्पूर्ण गल्फ क्षेत्रका लागि इतिहास रचेकी छन्। अलसरकालले अन्तर्राष्ट्रिय स्तरमा महिला खेलाडीहरूको सम्भावना देखाएको भन्दै उनलाई विभिन्न अन्तर्राष्ट्रिय मिडियाले ‘प्रेरणादायी व्यक्तित्व’का रूपमा चित्रण गरेका छन्।
अलसरकालले रोयटर्ससँगको कुराकानीमा भनिन्, “म अहिले सम्म ३५ भन्दा बढी देशमा खेल्न पुगेकी छु। तर, यसले धेरै जिम्मेवारी ल्याएको छ। देश, संस्कृति र महिला पहिचानको प्रतिनिधित्व गर्नु सजिलो कुरा होइन।” उनका अनुसार यात्रासँगै आउने चाप ठूलो हुन्छ र खेलाडीलाई मानसिक रूपमा तयार रहनुपर्ने हुन्छ।
रुडा चार वर्षकै उमेरमा चेस खेल्न थालेकी थिइन्। सुरुमा उमेर कम भएको कारण उनलाई चेस क्लबले अस्वीकार गरेको थियो। तर, पहिलो प्रशिक्षक हिशाम अल-अरघाले उनलाई मौका दिए। रुडाले पहिलो दिनमै नाइट (घोडा) सही रूपमा चलाउन सकेपछि प्रशिक्षक प्रभावित भए र प्रशिक्षणको बाटो खुल्यो। त्यसपछि उनी निरन्तर अभ्यास गर्दै चार वर्षमै एसियाली च्याम्पियनसिपमा कांस्य पदक जित्न सफल भइन्। केही महिनापछि उनले एसियाली विद्यालय च्याम्पियनसिपमा पहिलो स्थान प्राप्त गरिन्।
अलसरकालका अनुसार यो यात्रामा उनले धेरै त्याग गर्नुपर्यो। उनले भनिन्, “बाल्यकालको धेरै हिस्सा मैले चेसलाई दिएँ। विद्यालय छुट्यो, साथीहरूसँग रमाइलो गर्ने समय थिएन। परिवारका धेरै कार्यक्रममा म सहभागी हुन सकिनँ। पाँच वर्षकै उमेरदेखि क्लब, परिवार र महासङ्घबाट ठूलो अपेक्षा थियो।” तर, उनले एकै सासमा थपिन्, “तर म यो बाटो रोजेकोमा पछुताउँदिन। यो यात्राले मलाई आज जहाँ पुर्याएको छ, त्यो अद्भुत छ।”
इजरायल, रोमानिया लगायत विभिन्न देशमा प्रतिस्पर्धा गरेर फर्किएकी अलसरकाल अहिले पनि निरन्तर अभ्यासरत छिन्। उनले भनेकी छन्, “विद्यालय र चेस दुवैलाई सन्तुलनमा राख्नुपर्छ। जब म विद्यालयमा हुन्छु, सामान्य विद्यार्थी हुन्छु। तर, खेलमैदानमा म फरक व्यक्ति बन्छु।”
अलसरकालले प्राप्त गरेको यो सफलता गल्फ क्षेत्रका अन्य महिलाहरूका लागि ठूलो प्रेरणा बनेको छ। अहिले उनी थप अन्तर्राष्ट्रिय प्रतियोगितामा तयारी गर्दैछिन् र भविष्यमा अझ उच्च स्थान हासिल गर्ने लक्ष्य राखेकी छन्।
