सुनसरीमा दुई दिनमा ४ हजार २ सय किलो गाँजा बरामद, बन्दाकोपीको ट्रक प्रयोग

इटहरी, ३ असर । बन्दाकोपी र अदुवा बोकेको ट्रक प्रयोग गरी गाँजा तस्करी गर्ने गिरोहविरुद्ध कोशी प्रदेश प्रहरीले कडा निगरानी थालेको छ। पछिल्ला दुई दिनमा मात्र प्रहरीले ४ हजार २ सय ३० किलोग्राम गाँजा बरामद गर्न सफल भएको छ।

सोमबार धरान-१३ स्थित शिवधारामा भेडेटारबाट धरानतर्फ आउँदै गरेको प्रदेश १–०२–००२ ख ०८४८ नम्बरको ट्रकबाट २ हजार १ सय ३० किलो गाँजा बरामद गरिएको थियो। ट्रकमा अदुवा र बन्दाकोपी देखिनेगरी माथि छोपिएको थियो। तलतिर ७० वटा प्लास्टिकको बोरामा गाँजा भरिएको अवस्थामा फेला परेको प्रहरीले जनाएको छ।

त्यसैगरी मंगलबार इटहरी-२० स्थित तरहरा जंगल नजिकै चेकजाँच गर्दा ना५ख ६११६ नम्बरको अर्को ट्रकबाट पुनः २ हजार १ सय किलो गाँजा बरामद भएको छ। उक्त ट्रकमा पनि बन्दाकोपी र आलुको बोराले गाँजा लुकाइएको थियो।

प्रहरीले ट्रक चालक धनकुटा शहिदभूमि गाउँपालिका-६ का राजेन्द्र राई, सोही गाउँपालिकाका सुनिल राई र बराहक्षेत्र नगरपालिका-९ का सुमन राईलाई नियन्त्रणमा लिएको छ। प्रहरी स्रोतका अनुसार उनीहरूले गाँजा भारततर्फ लैजाने तयारी गरेका थिए।

यता, इलाका प्रहरी कार्यालय भेडेटारले धनकुटाको साँगुरीगढी-६ बाट चेकजाँचकै क्रममा नारायणप्रसाद राईलाई ९ किलो ९ सय ग्राम गाँजासहित पक्राउ गरेको छ।

गाँजा कारोबार रोक्न प्रदेश प्रहरीले निगरानी कडा बनाएको बताइएको छ। घरेलु बालीको नाममा तस्करी बढेपछि सुरक्षाकर्मी थप सतर्क बनेका छन्।