काठमाडौँ,६ भदौ । करिब दुई अर्ब रुपैयाँ बराबरको सट्टाबाजी, मुद्रासम्बन्धी, र सम्पत्ति शुद्धीकरणको अभियोगमा पक्राउ परेका काभ्रेको मण्डनदेउपुर नगरपालिका–८ का २४ वर्षीय अनिल ढुंगाना जेल चलान भएका छन्। अनिललाई उपत्यका अपराध अनुसन्धान कार्यालयको टोलीले गएको वैशाख २९ गते भक्तपुरबाट पक्राउ गरेको थियो।
अनिलको गिरफ्तारीपछि, भक्तपुर प्रहरीलाई अनुसन्धानको जिम्मा दिइएको थियो। करिब दुई महिनासम्म चलेको अनुसन्धान पछि साउन २९ गते भक्तपुर जिल्ला सरकारी वकिल कार्यालयमा अनुसन्धान प्रतिवेदन बुझाइएको थियो। सोही प्रतिवेदनको आधारमा जिल्ला अदालत भक्तपुरले अनिललाई पुर्पक्षका लागि थुनामा पठाउने आदेश दिएको छ। हाल अनिल सुन्धारास्थित केन्द्रीय कारागारमा रहेका छन्।
नेपाल राष्ट्र बैंकले अनिलका कुमारी बैंक खाताबाट सात करोड रुपैयाँको शंकास्पद कारोबार भएको देखेपछि प्रहरी अनुसन्धान सुरु गरिएको थियो। यसका साथै, लक्ष्मी सनराइज बैंक र ग्लोबल आइएमई बैंकका खाताहरूबाट पनि ६–६ करोड रुपैयाँको कारोबार भएको देखिएपछि अनिलमाथि अनुसन्धान थपिएको थियो।
अनुसन्धानका क्रममा अनिलले आफन्तको नाममा ५६ वटा बैंक खाता खोलेर अवैध अनलाइन जुवा (सट्टाबाजी) खेलाउने गरेको तथ्य फेला परेको थियो। अनिलले ५५ वटा बैंक खातालाई ११ वटा कनेक्ट आईपीएसमा जोडेर र १५ वटा वालेटमार्फत कारोबार गरेको पुष्टि भएको छ।
अनिलले ‘जुवा ३६५’ नामको फेसबुक पेज बनाएर अनलाइन जुवाको नेटवर्क निर्माण गरेको थियो। उनले पेजमा आबद्ध हुनेहरूलाई प्रलोभनमा पारेर सट्टाबाजीमा सहभागी गराउँथे।
प्रहरीको दाबी अनुसार, अनिलले भारतमा समेत अनिल साहको नामबाट भारतीय आधार कार्ड, प्यान कार्ड र दिल्ली मेट्रो कार्ड बनाएर सट्टाबाजीको धन्दा सञ्चालन गरिरहेका थिए। यसबाहेक, भारतीय एचडीएफसी बैंकमा खाता खोल्नुका साथै विभिन्न व्यक्तिका नाममा चेकबुक र मोबाइल सेटहरू पनि प्रहरीले बरामद गरेको छ।
अनिलले १२ लाख रुपैयाँ सट्टाबाजीमा हारेपछि ‘वनएक्स बेट’को मोबाइल क्यास एजेन्टका रूपमा काम गर्न थालेका थिए। यस क्रममा उनले ‘वनएक्स बेटिङ’का खेलाडीको कमाइबाट प्रतिशत कटौती गर्ने गरेका थिए।
प्रहरीले अनिलसँगै १२ जनालाई प्रतिवादी बनाएको छ। तर, अनिलका आमा-बुबा र बहिनी समेत फरार छन्। अनिलले उनीहरूको खाताहरू अवैध कारोबारमा प्रयोग गरेका थिए।
अनिलको यो प्रकरणले नेपालको सट्टाबाजी र सम्पत्ति शुद्धीकरणमा संलग्नता र यससँग सम्बन्धित कानुनी चुनौतीहरूको पर्दाफास गरेको छ।