उनिहरुले हामीलाई सँधै रजस्वला बनाइरहे
र
छुन नहुने, अछुत बनाइरहे
बोल्न नहुने, अबोला बनाइरहे
हेर्न नहुने, गान्धारी बनाइरहे
हाँस्न नहुने, द्रौपदी बनाइरहे
अस्मिता जाँच्न सिता बनाइरहे
प्रेममा बाँध्न राधा बनाइरहे ।
उनिहरुले यस्तो बनाइरहेकै बेला
हाम्रो अवसरका ढोकाहरुमा गजबार हालिरहे
हाम्रो उत्सवका बाटोहरुमा ढाट थापिरहे
हाम्रो विचारहरुमा अन्धविश्वास फ्याँकिरहे
हाम्रो आस्थाहरुमा पितृसत्ता न्याकिरहे
हाम्रो रोजाइहरुमा नेल ठोकीरहे
हाम्रो स्वतन्त्रतालाई कैद ठोकीरहे ।
हो उनिहरुले हामीलाई सँधे रजस्वला बनाइरहे
अबला, अपवित्र र अमर्यादित ठहर्याइरहे ।