काठमाडौं, १२ मंसिर । सत्ता गठबन्धन साझेदार दल नेकपा (एकीकृत समाजवादी) काठमाडौँ निर्वाचन क्षेत्र नम्बर ४ (२) का उम्मेदवार कुसुमकुमार कार्कीले गठबन्धनका दलहरु एवं क्षेत्रका मतदातामा आभार प्रकट गरेका छन् ।
निर्वाचन क्षेत्र ४ नम्बर २ का उम्मेदवार कुसुमकुमार कार्कीलाई उम्मेदवार बनाउने गठबन्धन र मतदान गर्ने मतदातालाई धन्यवाद ज्ञापन गरेको हो । निर्वाचन परिचालन कमिटीको अध्यक्ष कुमार ओझाको अध्यक्षतामा शनिवार तारेभीरमा चुनाव समीक्षा भएको थियो ।
समीक्षा बैठकमा पार्टीका शीर्ष नेताहरूले कमजोर संगठन, अरुको गठजोड, आर्थिक अभाव तथा नयाँ शक्तिहरूको बलियो उपस्थितिमा पनि इमानदार भएर मतदान गर्ने ८ हजार भन्दा बढी मतदातालाई धन्यवाद ज्ञापन गर्ने निर्णय गरेको हो ।
कार्यक्रममा उम्मेदवार तथा नेकपा (एकीकृत समाजवादी) का केन्द्रीय सदस्य समेत रहेका कार्कीले निर्वाचन परिणाममा झिनो मतले हारजित भए पनि संगठन बलियो पारेर अघि बढ्न सके ४ (२) को निर्वाचन क्षेत्रमा समाजवादी पार्टी बलियो हुने बताए । निर्वाचन हारेपनि समाजवादीको निर्वाचन क्षेत्र विकास गर्ने मुद्दा स्थापित भएको उनले बताए उनले भने ” हामीले संयुक्त चुनावी प्रतिबद्धता प्रकाशन गरेका छौं केन्द्रमा हामीले गगनजीलाई जिताएका छौ अब त्यसलाई पुरा गराउन हामीले मतदातालाई भने बमोजिम कार्यालय खोलेर बस्ने छौं ।“